YERDƏLƏNİN BİRİNCİ MƏRTƏBƏSİ
Günəş yerini dəyişəndən sonra insanlar yerin altında yaşamağa məhkum edilmiş, gələcəyə bəslədiyi ümidlərini elə Günəşlə birgə üfüqün arxasında itirmişdi. Ancaq insanların itirdiyi tək azadlıq deyildi. Yadplanetlilər onların içində gizlənən müəmmanı canlarından sovurub çıxarmışdı. Bəs görəsən, Yer planetinin Yupiterin qaz atmosferində batırılması mesajının arxasında nə gizlənirdi?
Əlavə olaraq kitaba müəllifin retrospektiv tərzdə yazdığı “Axırıncı yol qəhvəxanası” povesti və daha üç hekayəsi daxil edilib.
Redaktor: Şəfəq Nasir
“Zərdabi Nəşr” MMC, Bakı, 2025, 176 səh.
© Məmməd Məmmədli, 2025
AY İŞIĞI
povest və hekayələr
“Ay işığı” kitabında Xavier Serkasın “Təhrik” povesti, Qustavo Adolfo Bekkerin “Ay işığı”, İ.Alyendenin “Ümidsiz sevgi məktubları”, V.B.İbanesin “Məhkum olunmuş qadın”, “Mavrin qisası”, “Dənizdə”, X.Rulfonun “Alovlu gecə” hekayələri yer alıb.
İspan yazıçısı Xavier Serkasın “Təhrik” (El Móvil) povesti vaxtilə İspaniyada bestseller olub və böyük oxucu auditoriyası qazanıb. Əsərin qəhrəmanı Alvaro hüquq məsləhətxanasında işləyən bir ədəbiyyat vurğunudur. Gerçək hadisələr əsasında novella yazmaq qərarına gəlir.
Azərbaycan Yazıçılar Birlliyi və Ulduz jurnalının birgə layihəsi
Layihə rəhbəri: Qulu Ağsəs
İspancadan çevirəni: Məmməd Məmmədli
Redaktor: Həyat Şəmi
Bakı, “Təhsil” 2019, 144 səh.
AXIRINCI YOL QƏHVƏXANASI
povest
Lamiyəni tanıyan qatil kimliyini bildirmədən qızın valideynlərini öldürmək üçün qəribə bir üsula əl atır. Bu dəhşətli hadisə Lamiyənin həyatını bütünlüklə alt-üst edir. Oxuduğu universitetdən qovulur, sevgilisindən ayrılır, nənəsi həyatıyla vidalaşandan sonra isə tamamilə tək qalır. Rəfiqəsi Lamiyənin maddi durumunu guya yaxşılaşdırmaqdan ötrü onu öz tərəfinə çəkir. Lamiyə bu əxlaqsızlığa nə qədər müqavimət göstərsə də, həyat onu uçuruma sürükləyir və o, sonda özüylə bacara bilməyib gerçəkliklə barışmalı olur.
XÜSUSİ MADDƏ AXTARIŞINDA
qısa roman
Azərbaycan Günəşə ən yaxın olan ulduza xüsusi maddə tapmaq ümidilə ekspedisiya göndərir. Kosmik balığın kapitanı Mübarizin qarşısında yalnız bir vəzifə dayanır – Alfa Sentavra mümkün qədər tez çatmaq və orada kükürd və neon elementlərinin birləşmə prosesini izləmək. Ancaq hadisələr planlaşdırıldığı kimi getmir. Yerdən qaçırılmış rok qrupunun üzvlərini Marsdakı yadplanetlilərdən xilas etməklə Mübariz ona edilən xəbərdarlığa məhəl qoymur. Və bu hadisə ekspedisiyanın dönüş nöqtəsinə çevrilir. Komanda Alfa Sentavra nəzərdə tutulmuş vaxtdan tez çatır və orada yeni sivilizasiya aşkar edir. Bəs onlar xüsusi maddəni tapırlarmı?